Black Hole
جرابع في قصور و قطاطس في زبل
وكبش بلا كرون جا ينطح جفل
طبيبهم مريض-و ذواهم يشل
فسماهم غيوم اما مطرهم ,ما تبل
كان تحمل الذل ما تقطع باسبور
بلا فيزا مطبوعة كل صفحة ديكور
كل صفحة تستنا في طابع مطبوع
تستنا في هجة ورا الموجة بلا جوع
نفس الموضوع نفس الخوماضة
بزازل متفوخة وجوه بالبوماضة
نفس البرنامج في نفس الاذاعة
معادش مظاهر تلافز خداعة
ميديا اشاعة واقع مزيف
لي خلى الرقبة تتشرّط عالسيف
سطر ما يشيخ و الجونتة ما تكيف
الحرام مزين و الحلال يعيف
الخيال حقيقة في راسك يترسخ
لGomme ليكتب والستيلو لي يفسخ
و مخك المسخ كي يخمم بنظافة
كي سطوش المعبي و طاح بين الكحافة
حتى الصحافة معادش في الفاك
ولات Instagram و مكياخ فين الساك
ستيلو الحبار كي تعب استقال
بقلم الحومير تكتت المقال
كلام ما يتقال و افعال ما تترا
تلافز ميحاض تسرب في خرا
افاعي تتلوى تحركها الالحان
وجمهور يصفق يتفرج فرحان
اكبر طحان ولى بطل
طليان في شقف تتصور الحل
حتى العفن يتصور عسل
كي تشوف في المراية تو تلقى الخلل
مخك ما يفكر بالشيخة مثقل
صورو قدامك مستقبل مسكر
هوما يصورولك مش انت لي تصور
هوما ليمركيو وقت انت لي تكور
شد كالة دور ارخي الاعصاب
اقعد تندم قولهم ما صاب
اقعد كي الجثة تعيش فوق التراب
المرفق لتشل مازيهمز مجرَاب
كلشي تقلب مشا بالمعكوس
كيما كالحر لحاسد محبوس
حتى العبادة معادش في المسجد
ولات في البنوك كي الرب ولى فلوس
ادى الطقوس بلفة بو عشرة
خاطر بو خمسين تنسي في العشرة
كمة في مدينة تضحك عالدشرة
وما تبدل الطقس مذيعة في نشرة
جابو نحات باش ينحت تمثال
يصورلنا العبرة و يعطينا مثال
لينحت جا يلوج ما لقاش الطين
تمثال بوركيقة منحوت بالطحين
جابو نحات باش ينحت تمثال
يصورلنا العبرة و يعطينا مثال
لينحت جا يلوج ما لقاش الطين
تمثال بوركيقة منحوت بالطحين
تاريخ مزيف معبي تحريف
جاو لربيع كتبوه خريف
جاو لصباب ردوه مناضل
كتبوه رئيس في بطافة تعريف
واقع مخيف وجيل مفورماطي
متخرج من Google بايت يشاطي
طموحو ستوري و شطحة Tik Tok
في ليل يبات يلحم و يفيق على بلوك
كراسي و احزاب باعت البلاد
وبنية صغيرة ماتت في الواد
شعب يتفرج في نفس المسلسل
والمخرج ما تفكر ما صور جهات
بنية تحتية رايبة وسقاطة
نهار عيد ميلادك تتوفى في بواطة
تحل باش تفهم لي صاير
تلقى برامج متاع غشة ومساطة
مع وذن ما تسمع ما يفيد الصوت
والتاج لي بالشوك عالراس لمحطوط
شقف ليحرق وَلى تابوت
في بلادنا شتعيش لازمك تموت
باش تعمل مشروع لازمك كتف
دمعة لتسيل ما حبت تكف
شيخة فى العرق و الدم بدا يجف
حراقة في كفن كي جوانت تتلف
تاكل الكف على جال ورقة
تروح لدار مظلوم عينك زرفة
ظلم و الفقر يلزك لسرّقة
ل menotte وال matraque تلزك للحرقة
اغطس فى المرقة غص بالبابة
حوت و الكافيار كلاتو الصبابة
حقك ما صاعغش حقك موجود
فن خزينة دولة شادتهآ القلابة
فقر تنشر خماج تبراكي
كي زنقة تظلام زومبي تتاكي
سلعة تتسربا تقريب في كل نهج
ولاد صغار تكونصومي في الرهج
ماهيش بلاد هاذي جَحيم
لا مخ يفكر لا منهج تعليم
شعب كي الموطور لتفشتلو عجلة
خرع للكياس وجايبها تقليم
ذكورة تتكربك أناثي تبور
كره نميمة حقد و سحور
تصاور و طلامس ـمرمية في فبور
ديوانة و رشوة فِي نقطة عبور
جوع لكثر و الفساد لي هاج
تصدر ف دقْلة و زيت و محتاج
عايشين بلا قيمة ما فلحنا في شي
حتى نسور قرطاج طلعت دجاج
تكريك و دلال نفس الروتين
و نفس النفاق لتشوفو فى العين
نفس الوجوه ونفس القناع
و نفس الذناب لي في وادي الضباع
هوني برشة خداع صحكة مغلق
صحابك تطيح تضحك تتلف
العطار تمشيلو ميحبش يصرف
احزاب تصلي بقرآن محرف
شعب متخلف فيبالو طار
اقصى طموحو باب المطار
يحكي على الثقة و هو اكبر غدار
و لضرب بالحجر نسا دازو بلار
نهار لتطيح ما يوقفك حد
يحبو البيبان في اوجهك تتسد
ماتت الروح مزال الجسد
و عمرو ما الضبع يولي أسد
كل واحد وكارو كل واحد و قدرو
ثقة سكينة عطيتها للي غدرو
لغدرو قبل كانو اقرب الناس
كي حبيت تبني هدمولك الساس
ليقول ميعملش ليعمل ميقولش
موكل كلابهم عليا متدورش
بيدي ناخذ حقي منغورش
ردوني بركان وقالولي ما ثورش
غمض عينيك و امشي لبعيد
تحرر بأفكارك ما تعيشش عبيد
فسخ لفات و ابني عالم جديد
ليقة القبر كي تدردعها ما تفيد
الروح ما ترجعش و الميت ما يقوم
لقلبو بظلام ما اتضوبه نجوم
كي تبوسك العقارب تتطيش مسموم
ما تمدش خدك ومباعد تلوم
لتعلم يعوم يعرف الغرق
كي القاضى ليفرق الباطل من الحق
و لكتب صدق كي تعكس الحروف
كي الزين ليحلا في عين المكفوف
مهما كليت كفوف و تعلمت دروس
عمرك لا تعرف خفايا النفوس
الغدرة كي تجي عمرها ما تشاور
لا يغرك اصحابك وضحكة فى تصاور
العين حرفة القلوب مصدية
عمرك لا ترحم اعفس تعدا
كى تشوف صديد يكلاشي الفضة
تفهم لنباحهم أقوى من لعضة
نلعب بالموت كيما نلعب بالقافية
نلهب مش كيفهم جمرتهم طافية
مانيش نتكبر آخرتي في تراب
أنا موجود وعباد تعمل في راب
